VIGAN CITY – Makikin-kinnammayeten ti Overseas Workers Welfare Administration (OWWA) iti pamilya ni Maricar Valdez, ti Pinay domestic helper a mapapati a maikanem a biktima ti serial killer a suldado idiay Cyprus.
Segun ken ni Ricardo Arquiolar Jr., inunaan a kabsat ni Valdez, adda ti napan iti lugar da idiay Gabur Norte, Sta. Cruz ket nagsaludsod da kadagiti personal nga impormasyon ti biktima para iti tulong a posible a maited kadakuada.
Naulila ti biktima ti kakaisuna nga anak na nga isu ti rason nu apay a napan idiay Cyprus ta kayat na a maikkan iti naranyag a masakbayan.
Saan pay laeng a sigurado ni Arquiola nu kaano a maiyad iti bangkay ti kabsat na ta segun ti ina da nga adda met laeng idiay Cyprus, naidalan iti baro a DNA test ti bangkay na ket aguray da iti sangapulo ket lima nga aldaw para iti resulta na.
Ngem kinunana a siguradon ti ina da a ti kabsat da a mapukpukaw iti nasarakan iti uneg ti maleta a naibelleng idiay Red Lake, Mitsero, Cyprus.
Idi napalabas a tawen ket nagpukaw ti biktima kalpasan a nagpakada a mapan iti gayyem na ket saan dan a ninamnama a bangkayen a masarakan da.
