Pinasingkedan ti Malakanyang nga uray ni Overseas Workers Welfare Administration deputy administrator Emma Sinclair ket naikkat iti puesto gapu iti mapapati a naanomalya a land acquisition deal a nakairamanan pay ni dati nga OWWA administrator Arnell Ignacio.
Segun ken ni Palace Press Officer Usec Atty. Claire Castro, naikkat iti puestona ni Sinclair gapu iti pannakapukaw ti talek ken kompiansa mainaig iti P1.4 billion land acquisition deal.
Kinuna ni Castro a nasken nga agserbi daytoy a ballaag kadagiti amin a public servant a maikkatda amin no saanda nga aramiden ti trabahoda iti publiko.
Mangal-ala ti Department of Migrant Workers iti naan-anay nga impormasyon mainaig iti naanomalya a katulagan, a mapapati a saan nga impalubos ti OWWA board, sakbay a maipila ti kaso kontra kadagiti nairaman.
