VIGAN CITY – Balligi a naisayangkat ti Department of the Interior and Local Government ti Ilocos Sur iti “Orientation on Early Warning, Prevention, and Response to the risk of violent Extremist Group” idiay San Ildefonso, Ilocos Sur.
Iti pannaki-uman ti Bombo Radyo Vigan ken ni DILG Provincial Director Randy Dela Rosa, gagem ti nasao nga orientation a maiyadal kadagiti barangay official wenno participant no ania dagiti pakailasinan ken tignay tapno malapdan iti parikut ti violent Extremist Group wenno dagiti mangdadael iti urnos ket talna ti lugar.
Segun ken ni Dela Rosa, karaman kadagiti maiyadal dagiti opisyal ket no kasano a masalwadan dagiti tattao, kangrunaan dagiti ubbing, ken kadagiti nalaka a maguyugoy ti nasao a grupo a sumurot kadakuada.
Inyunay-unayna a dagiti barangay officials ti mabalin a kamangan dagiti tattao no adda dagiti grupo a mangal-allukoy kadakuada a sumali iti grupoda, wenno agplanplano a manggulo iti komunidad.
Ti nasao nga aktibidad ket paset iti programa ti National Task Force to End Local Communist Armed Conflict.
Kabayatanna, agyamyaman met ni Dela Rosa nga awan pay iti nairekord da a kaso iti terorismo iti probinsia ti Ilocos Sur.
