VIGAN CITY – Mamuelta iti duaribo a pisos dagiti aglabsing ti facemask ordinance a naipatungpal iti ili ti Sta. Catalina kas wagas tapno maliklikan ti panagraira ti COVID19 agsipud ta napaliiw met iti nasao nga ili ken ti intero a probinsia nga epektibo dagiti protocol a rumbeng a masurot.
Segun ken ni Mayor Edgar Plong Rapanut, no man pay saanda kayat a mueltaen koma dagiti agindeg iti nasao nga ili ket kasapulan tapno awan ti sukir ken saan a maapektaran ti tunggal maysa manipud iti nasao a sakit.
Agtultuloy met ti panangipalagip dagiti pannakabagi ti linteg iti nasao nga ili kadagiti agindeg a sumurotda kadagiti pagannurotan a naipatungpal.
Kabayatanna, ar-aramidenda amin a kabaelanda tapno matulongan ida pakairamanan dagiti mannalon ket pinasingkedan ti mayor a mailepleppasdan ti pannakaipaay ti tulong kadagiti kailinna iti salinong ti social amelioration program.
