VIGAN CITY – Inlawlawag ni Sangguniang Panglungsod Member Third Ranches ti ordinansa inaig ti panagsubli dagiti estudiante, mangmangged, OFW a naawanan ti trabaho ken dagiti na-stranded a turista ditoy Vigan City.
Iti pannaki-uman ti Bombo Radyo Vigan kenni Ranches, dagiti residente a naggapu kadagiti lugar a naisakup iti general community quarantine ket saanen a kasapulan nga ag-quarantine no la ket addan iti certificate a mangpaneknek a nalpasdan iti panagquarantine-da kadagiti lugar a naggapuanda.
No dagiti residente a naggapu kadagiti lugar a naisakup iti enhanced community quarantine a sumrek ditoy siudad ket maidalanda manen iti 14 day quarantine period tapno masigurado iti kinatalgedda.
Kabayatanna, dagiti met naggapu kadagiti lugar a naisakup iti general community quarantine ket rumbeng a mapanda iti City Health Office para iti health declaration.
No pay kasta, allukoyen ti opisial dagiti agawid ditoy siudad a makikammayetda iti City Health Office tapno nadardaras met laeng iti panagawidda.
