VIGAN CITY – Naipatakderen ti umuna ti Cyber Response Team Office iti intero a rehion uno idiay Camp President Elpidio R. Quirino, Bulag, Bantay a mabalin a kumamangan dagiti adda issue-na iti cyberworld.
Dayta ket babaen ti inisyatiba ni Ilocos Sur Police Provincial Office Provincial Director Police Colonel Marlo Castillo.
Iti pannaki-uman ti Bombo Radyo Vigan ken ni Police Lieutenant Colonel Greg Guerrero, sakup ti opisina dagiti amin a kaso maipanggep ti cybercrime online kas iti Facebook, email, text messages, ken viber a pakaipalaonan dagiti nadumaduma a klase ti pammadakes.
Dagiti tattao nga adda parikutna maipanggep iti cybercrime ket mabalinda ti direkta a mapan mangidatag iti Cyber Response Team Office ta kitaendanto no libelous ti naipost ket numan kasta, ma-screenshot amin nga ebidensya ken maala ti palawag ti biktima.
Binalakadan pay ni Guerrero dagiti tattao a maita-tag kadagiti pornsite iti online a saanda a lukatan ti link a naipatulod wenno nai-tag kadakuada tapno saan a matakaw dagiti data ti user.
No kasta ti mapasamak, agrequestda iti mismo a pornsite tapno ma-delete daydiay a video kasta metten nga agaramidda iti report a pakairamanan ti police blotter ken affidavit ti biktima.