VIGAN CITY – Maragsakan dagiti operator ti galyeraan iti probinsia ti posible a pannakaisubli ti operasyonda kadagiti nadumaduma nga ili.
Iti pannaki-uman ti Bombo Radyo Vigan kenni Provincial Animal Quarantine Martel Quitoriano, nagtataripnongda idi napalabas a lawas kadduada ni Governor Ryan Singson tapno adalen ken kitaen iti pannakaisubli ti tadi a nabayagen a naisardeng gapu iti epekto ti agdama a pandemia.
Patien ni Quitoriano a babaen iti pannakaisubli ti operasyonda ket adu dagiti maragsakan ken mabenepisyaran kangrunaan dagiti empleyado ti cock pit arena manipod ti pit manager agingga ti kababaan a pwesto.
Innayon ti opisyal a posbile a maisubli ti operasyonda sakbay nga agtapos ti bulan iti Disyembre ken manarimaan iti pannakaiproseso dagiti kasapulanda a dokumento ken iti masurot a protocols ti DILG, IATF ken ti firm a mangtulong kadakauda iti semi new normal cock fighting.
Kangrunaan a masapol a suruten dagiti dumar-ay wenno mapan ket iti panagbalinda a fully vaccinated kontra COVID19 ken dagiti mangmangged a kristo ti galyareaan ket napanunutan da a baliwan iti trabahoda a saanen nga agipukkaw ti pusta tapno maliklikan iti posible a pannaiwaras ti nasao a virus ken kiniddaw ni Quitoriano a masapol a disiplinado dagiti makipaset ta awan iti agbalin a parikotda.
