Sinuspenso ti Land Transportation Franchising and Regulatory Board (LTFRB) ti operasyon dagiti duapulo ket dua a bus manipod iti dua a transport companies gapu iti agduduma a panaglabsing ti safety ken comfort dagiti pasahero.
Segun ken ni LTFRB Chairperson Atty. Vigor Mendoza II, sinuspensoda iti nasurok tallopulo nga aldaw iti sangapulo ket pito a passenger buses nga iop-operate iti Elavil Tours Inc. ken lima a bus iti AMV Travel and Tours nga agpada nga adda rutana a Bicol-Manila.
Kinuna ni Mendoza nga agserbi koma a ballaag ti panagsuspensoda kadagiti transport companies tapno sumurot iti pagannurotan para iti nataltalged nga operasyon ken mapagtalinaed ti passenger-friendly stations ken terminals.
Maibasar ti suspension of operations, nangiruar payen ti show-cause orders iti LTFRB iti dua a transport companies tapno pagpalawagen nu apay a saan a rumbeng a masuspenso wenno makanselar dagiti prangkisada.
