VIGAN CITY – Napagtutulagan dagiti kameng ti Ilocos Sur provincial government a maisardeng pay laeng ti onsite antigen testing inton December 24, 25, 31 ken inton January 1 ditoy probinsia tapno maikkan gundaway dagiti frontline health workers nga adda iti border a makadua ti pamiliada ita a tiempo ti paskua.
Binalakadan ni Governor Ryan Singson dagiti agawid ditoy probinsia a masapul a kompleto dagiti papelesda ta dagiti kameng ti Bureau of Fire Protection ken Philippine National Police ti mangkitanto kadagiti requirements da.
Saanen a masapul ti panagtalinaedda iti quarantine facility ta home quarantine iti las-ud ti sangapulo ket uppat nga aldaw laeng ti insingasing ti provincial government kadakuada.
Impalagip ni Singson a ti lima gasut a pisos a diskwento para iti antigen test ket mayaplikar laeng iti maikapat, maikawalo ken maikasangapulo ket dua nga aldaw a panagtalinaedda ditoy probinsia ket saan nga iti onsite test a maar-aramid iti border ta sangaribo a pisos ti bayadan ti tunggal agpa-antigen test.
Nupay kasta, nagyaman ti gobernador kadagiti Local Government Units ti probinsia a nangidiaya iti libre nga antigen testing.
