VIGAN CITY – Binallaagan ni Provincial Quarantine Officer Martel Quitoriano dagiti online meat seller a kitaenda a naimbag dagiti pagtaltalkanda a supplier tapno legal met laeng iti panangipastrekda kadagiti produkto ditoy probinsia.
Dayta ket gapu ta adda manen walopulo a kilo ti pork ham a naikarga iti kotse ti nasalamaan dagiti pannakabagi ti linteg iti animal quarantine checkpoint idiay Bio, Tagudin a maipan koma idiay Santiago.
Nabigbig dagiti suspek a ni Rolando Raquedan, agtawen ti limapulo nga agnaed idiay Santa Rita West, La Union ken ti kaduana a ni Kenneth Louise Dy, agtawen ti duapulo ket uppat nga agnaed idiay Benito Sur, Aringay nga agpada nga awan ti naipakitada a shipping permit ken inspection certificate dagiti kontrabando ken saan nga accredited ti luganda nga agipastrek kadagiti meat products.
Iti pannaki-uman ti Bombo Radyo Vigan ken ni Quitoriano, saanda nga iparit iti agnegosyo babaen iti online ngem kasapulan a dumalanda latta iti usto a proseso ta maipatpatungpal pay laeng ti pork ban ditoy probinsia gapu iti African Swine Fever.
Nupay kasta, maipanen iti Provincial Veterinary Office dagiti nasalamaan a produkto.
