VIGAN CITY – Inallukoy ti Santa Municipal Police Station dagiti umili nangruna dagiti maburburiburan a makikammayetda iti Center for the Prevention and Treatment of Child Sexual Abuse nga isu ti mangidiaya ti libre nga online care and support kadagiti agkasapulan iti naan-anay a pammagbaga.
Ti nasao a banag ket naawagan iti Rapha Helpline a ti gagemna ket malawlawagan iti tunggal maysa kadagiti aniaman a pakaburiburanda iti biag ken iti kangitingitan payen ti pandemia ita a sangsangwen ti pagilian.
Adda dagiti trained counselors a mangtulong kadakuada ket mabalinda laeng a kontaken ti numero ta nakasaganada latta a mangsango kadagiti kliyente iti alas otso iti agsapa agingga alas singko iti malem.
Kalikagum ti Philippine National Police a matulungan dagiti umili tapno mapalagaan iti riknada kabayatanna iti agdama a sitwasyon ti COVID19 pandemic.
