Sumango iti witness stand ti Senate impeachment court dagiti opisial manipud iti Office of the Ombudsman ken Securities and Exchange Commission (SEC) ita nga aldaw, Setyembre 15 tapno sukisoken dagiti dokumento nga adda pakainaiganna iti maipagarup a saan a maipalawag ni Vice Presidente Sara Duterte.
Pinasingkedan ni House prosecutor ken Bicol Saro party-list Rep. Terry Ridon nga ipasango ti prosecution da Ombudsman Records Division Officer-in-Charge Atty. Karen Batu ken SEC Company Registration and Monitoring Department Director Atty. Gerardo del Rosario.
Manamnama a mangted ti testimonya ni Batu mainaig kadagiti rekord ti Statement of Assets, Liabilities and Net Worth (SALN) ni Duterte, idinto a manamnama a dakamaten ken paneknekan ni Del Rosario kadagiti corporate record nga adda pakainaigan na ken ni VP Sara ken ti asawa na a ni Atty. Manases Mans Carpio.
Dagiti dua ket sumango iti impeachment court kalpasan ti panag-testigo ni retired Sandiganbayan Presiding Justice Amparo Cabotaje-Tang idi kalman.
