Agpampanawagan dagiti Overseas Filipino Worker idiay Lebanon iti gobierno a malukatanen ti nasao a pagilian tapno makasublidan a mapan mangged ta nabayag metten nga awan ti riribuk a mapaspasaranda.
Iti pannaki-uman ti Bombo Radyo Vigan ken ni Bombo International News Correspondent Anita Adigue, kidkiddawenda a maibaban iti Alert Level 2 ti agdama nga Alert Level 3 status ti Lebanon tapno makaawid dagiti kayatnan ti agawid ken makasubli dagiti kayatna ti agsubli ta timmalna metten ti sitwasyon iti nasao a pagilian.
No met saanda a mapatgan dayta a kiddawda ket kayatda nga uray no maikaskaso man laeng ti surat nga impatulod ti Philippine Ambassador to Lebanon iti gobierno ta isuda ti ad-adda a makaammo ti sitwasyonda idiay nga OFW ngem agingga ita ket saan pay a natignayan ti kayatda a mapasamak.
Adu kadakuada ti kayatnan ti makaawid ngem parikutda ti kinaawan ti Overseas Employment Certificate isu nga uray no makaawidda ket maamakda amangan ta malapdan ida iti airport.
