Nakas-ang ken makapaladingit para kadagiti Overseas Filipino Worker idiay Spain ti pannakakemmeg ni dati a Presidente Rodrigo Duterte babaen iti arrest warrant nga impaulog ti International Criminal Court.
Iti pannaki-uman ti Bombo Radyo Vigan ken ni Bombo International News Correspondent Eva Tinaza, saanda a maaklun ti mapaspasamak ita iti Pilipinas ken maamakda no ania pay dagiti mabalin a sumaruno a mapasamak nangruna ket adda dagiti nabati a pamiliada iti pagilian.
Innayonna a saan a mababalaw no adu latta dagiti mangsupsuporta iti dati a presidente nangruna kadagiti kalugaranna idiay Davao.
Maipalagip nga idi Biernes, Marso 14 ket simmango iti umuna a gundaway ni Duterte iti International Criminal Court babaen iti video link.
Naituding met ti confirmation of charges-na inton September 23, 2025.
