VIGAN CITY – Madanagan dagiti kaaduan nga Overseas Filipino Worker idiay Hong Kong ta kalaksidan iti COVID19 pandemic ket maysa payen a pagbutbutnganda iti kumarkaro a rinnupak iti nasao a lugar.
Iti pannaki-uman ti Bombo Radyo Vigan ken ni Bombo International Correspondent Rose Alcid a taga-Talugtug, Candon City, agtultuloy ti panagpabettak kadagiti tear gas ken no kumaro pay iti rinnupak ket saanda a masigurado no ania ti kasasaaddanton nga OFW agsipud ta planon dagiti amoda iti pumanaw a mapan aglemmeng iti sabali a pagilian kas idiay United Kingdom ken Europe.
Mapaspasamak ti rally gapu ta kontraen dagiti democrat iti kayat nga ipatungpal ti China a National Security Law ken manamnama nga adda manen sumaruno a debate a mapasamak gapu iti naipila a gakat a mangdusa iti kaso a kriminal kadagiti saan a mangirespeto iti nailian a sonatada.
Gapu iti dayta ket patien dagiti agprotprotesta a no maipatungpal ti nasao a paglintegan ket malapdan iti wayawaya dagiti agindeg iti nasao a lugar. Kabayatanna, pinasingkedan ni Alcid nga agtultuloy ti panangsurotda kadagiti pagannurotan tapno maliklikan iti COVID19 ti lugarda ngem saan unayen a nainget ti pannakaipatungpal dagiti COVID19 protocol
