VIGAN CITY – Inpanamnama ni Atty. Hans Leo Cacdac, Administrator ti Overseas Worker Welfare Association, a tulonganda a makaawid ditoy pagilian ni Marie Joy Espejo, domestic helper idiay Saudi Arabia a kayat nan iti agawid ta namaltrato ken saan na a kabaelan iti agtrabaho iti naduma-duma nga amo uray nu nabiit pay laeng iti kaadda na idiay Saudi.
Inkari ni Cacdac nga ikagumaan da iti mangaramid iti wagas tapnu iti kabiitan a panawen ket makaawiden ditoy pagilian ni Espejo ken dusaen da ti recruitment agency na nu apay a saan da a kinita iti kasasaad na.
Ti napalabas a pannaki-uman ti Bombo Radyo Vigan ken ni Espejo, nadakamat na a ti uneg laeng iti sumagmamano a bulan ket mamin-anun a daras a nagsukat iti amo na ken saan a nasayaat iti trato da kenkuana ta adda pay ti nagbalin nga amo na a babai nga agim-imon kenkuana ken pinabasol da pay a dinadael na iti bado ti amo na a lalaki.
Agsipud ta nakapagpatang da Espejo ken ni Cacdac iti telepono babaen ti Bombo Radyo, nabang-aran iti rikna ni Espejo ken napalaus iti panagyaman na ta dakkelen iti namnama na a makaawid ditoy pagilian iti kabiitan a panawen.
