VIGAN CITY – Agtabonen itatta nga aldaw ti Overseas Filipino Worker idiay Saudi Arabia a natay gapu ti brain aneurysm a ni Maribel Patubo ket adu dagiti napan nangkita iti bangkay na iti maudi a gundaway idi kalman ken idi rabii.
Segun kenni Joseph Patubo, asawa ni Maribel, nalaus iti ladingit a marikrikna na agsipud ta maitabonen iti bangkay ti asawa na ket saan nanton a pulos a makita wennu makadenna pay.
Uray nu adun dagiti napan nangkita iti bangkay ni Maribel, awan iti napan nangkita kenkuana a kameng ti pamilya na idiay Barangay Paratong, Vigan City malaksid laeng kadagiti kakasinsin ken dadduma a kabagyan na.
Kiniddaw ni Joseph a saan kuma a babalawen to dagiti pamilya ti asawa na agsipud ta inbura na met amin a kabaelan na tapnu natalinaay ken naannayas iti pannakaitabon ti asawa na.
