VIGAN CITY – Addan iti pagbalbaliwan iti kasasaad ni Carmen Aglibut Tabon a taga Naguimba, Banayoyo nga arigna dua a tawen a nagtalinaed idiay King Fahd University Hospital ta naatake ken nadisgrasya iti uneg ti pagtaengan ti amo na idiay Riyadh, Saudi Arabia manipud idi naiyawid ditoy pagilian idi August 30.
Ti agdama, adda pay laeng idiay Candon City general hospital ni Tabon ta kasapulan na iti aginana ken makarecover iti bannug ti napaot a biyahe na, kadua na ni Romella Bayatin, ti Filipina nurse a nangipursige iti panagawid na ditoy pagilian babaen ti tulong ti Department of Foreign Affairs, Philippine consulate in Saudi Arabia ken Overseas Workers Welfare Administration (OWWA), pakairamananen ti Bombo Radyo Vigan nga isu ti maysa kadagiti nangipakaammoan ni Bayatin iti kasasaad ni Tabon idi idiay Saudi Arabia.
Kabayatanna, napalaus met iti panagyaman iti pamilya ni Carmen ta nakaawiden ditoy Pilipinas ti kameng ti pamilya da tapnu isudan iti maka-ammo a mangasikaso kenkuana bayat iti panagpaimbag na.
Ni Bayatin iti kadua ni Tabon a nagawid ditoy pagilian ta isu ti pinusgan ti OWWA ken Philippine Consulate idiay Saudi Arabia a mangkuyog kenkuana ta saan a mabalin nga agmaymaysa nga agbiyahe ni Tabon ta saan a makabangon ken saan pay a makasao ta adda iti tubo iti tengnged na, sabali laeng iti tubo iti tiyan na.
