VIGAN CITY – Kalikagum ni Margie Collado a taga-Las ud, Tagudin nga adda ita idiay Yanbu, Saudi Arabia a makaawiden iti pagilian gapu ti rigat a mapaspasaranna iti sidong ti amona.
Iti exclusive interview ti Bombo Radyo Vigan ken ni Collado, tunggal kiddawenna ti sueldona ta pasaray a madelay ket makanggeg iti saan a nasayaat a sarita ngem no sumungbat, isu met ti panangdangdangranda kenkuana.
Gapu dayta, impupok ti amona iti daan a balayda ngem nagundawayanna ti naglibas a napan iti bus station nga agturong idiay Jeddah tapno agpatulong iti Philippine Embassy.
Kalpasan dayta, innala isuna iti pulis ket innalada ti kopya ti passport na ngem insublida met la iti bus station ta binaonda a mapan iti Philippine Embassy idiay Jeddah.
Idi nagreport met dagiti amona iti police station, nagsubli dagiti kapulisan, ket nagsinnangoda ti amona iti police station ket pinaglabus isuna dagiti amonas iti sangwanan ti police station ken awanen pulos ti iggemna nga alikamenna.
Innayonna a sangapulo a bulanen nga ib-ibturanna ti rigat iti sidong dagiti amona ta malaksid dayta, adda pay ti 20-year-old nga special child a kabsat ti amona a mangkinkin-ud kenkuana ken mangramramas iti susona no makaturog ngem gapu ti kasasaadna ket aw-awatenna ti sitwasyon.
Idi met intawagna iti agency-na, ibagada nga ibturanna pay laeng agingga a nadanunna iti sangapulo a bulan a pannakaipupokna.
Innayonna a kabaelanna pay met nga ibturan ti bisin ta awan pulos iti taraon a maipaunegda ti kaduana a manipud met idiay Bangladesh ngem idi nakalukat pay ti tawada, adda naayat a basurero a mangipapaay kadakuada ti taraon babaen ti panangsisilpoda iti abbung ti ulo ti kaduana nga isu ti pakaigalotan ti taraon a dumanon iti kadsaaran nga ayanda ngem ita ket nasarraan manen ti tawa.
Iti agdama, agtaltalinaed ni Collado iti accommodation ti agency-na ngem pulos a saan a maipapaay dagiti kasapulanna.
Segun ti agency-na idiay Manila, adda exit visa-na ngem plane ticket laeng ti kasapulanna ngem kuna met dagiti amona nga awan ti pagbayadda.
Nupay kasta, kiddaw ni Collado nga uray saanen a makasueldo ken uray saanna a maala dagiti alikamenna ta ti kangrunaan a kiddawna ket makaawiden iti pamiliana ditoy pagilian.
