VIGAN CITY – Nangiyetnag ti Office of the City Mayor iti siudad a Vigan iti Executive Order a mangibilin kadagiti pribado nga establisimiento a siguraduen ti kinatibker ti istruktura ti pagubraan sakbay nga ituloyda ti operasyonda.
Dayta ket kalpasan ti panagdayyeg ti napigsa a gingined ken agsasaruno nga aftershocks.
Basar iti City Disaster Risk Reduction Management Council and Barangays, adda walon a nailistada a minor injuries ken nakaro a pannakadadael dagiti pasdek ken istruktura a gapuanan ti pannakaibakwit dagiti residente ken pannakapasarra dagiti pagadalan a mabalin a makadangran iti publiko pakairamananen ti Heritage District.
Idi kalman, July 27, imbilin ni Mayor Bonito Singson ti pannakasuspenso ti trabaho ken klase iti pampubliko ken pribado a pagubraan tapno masigurado ti kinatalged ti publiko ken makita a nalaing dagiti nadad-dadael a pasdek, opisina, ken istruktura iti siudad.
