Impaganetget ti Office of Civil Defense a saan laeng a ti Metro Manila ti masapul nga agsagana iti pangta ti gingined, no di ket ti intero a pagilian.
Segun ken ni OCD Administrator Usec Ariel Nepomuceno, paset iti plano ti ahensia ti panangisayangkat iti earthquake drills iti ruar ti National Capital Region.
Gagemda a masanay dagiti umili kadagiti probinsia a sangwen ti posible nga idadateng ti napigsa a gingined.
Maibasar iti PHIVOLCS data, innem ti aktibo a trenches ken adda 174 a fault systems iti intero a pagilian a nagduprakan dagiti napigsa a gingined – Abra iti Luzon, Bohol iti Visayas, ken dadduma a paset ti Mindanao kas ti Davao ken Cotabato a mangpaneknek nga awan ti natalged a rehion iti kastoy a klase ti didigra.
Tampok ti nadumaduma a scenario-based drills iti naisayangkat a drill idiay Diplog kas ti mass casualty management, hazardous materials response, fire ken oil spill containment, water ken high angle rescue, debris clearing, looting control, aeromedical evacuation, ken collapsed structure search and rescue.
