Pagan-annaden ti Office of the Civil Defense Region 1 dagiti agindeg iti rehion uno kagiddan ti posible nga iduduprak ti bagyo Emong.
Iti pannaki-uman ti Bombo Radyo Vigan ken ni OCD Spokesperson Adreanne Pagsolingan, nasken nga updated latta dagiti agindeg iti sasaaden ti paniempo nangruna no addada kadagiti lugar a landslide ken flood prone area tapno makasaganada.
Gapu iti saan a nasayaat, adda dagiti Local Government Unit a nalayus idinto a nairekord pay ti minor landslide kadagiti upland area ti La Union ken Ilocos Norte ngem awan ti naapektaran nga agindeg.
Maysa met ti bilang ti nadunor nga agtultuloy a maberberipika no daytoy ket adda pakainaiganna iti bagyo.
148 a pamilia katukad iti 427 nga indibidual ti adda pay laeng kadagiti evacuation center idinto a 95 a pamilia wenno 510 nga indibidual ti kimmamang kadagiti kabagyanda.
Agingga ita ket uppat a pulo ket lima met dagiti kalsada a saan a madalanan.
Kabayatanna, mangisaysayangkat ti OCD iti aktibidad tapno maipaayan dagiti naapektaran iti bagyo ken ti saan a nasayaat a paniempo iti tulong.
