Personal a nagturong idiay Masbate ni Civil Defense Deputy Administrator for Administration Asec. Bernardo Rafaelito Alejandro IV tapno ammuen ti kasasaad ti probinsia kalpasan ti panagduprak ti bagyo Opong.
Iti initial assessment, tallo ti kangrunaan a prayoridad ti nasken a masulbar – isu ti insigida a pannakaisubli ti koriente, communication services, ken panangipaay dagiti kasapulan a housing material kas ti shelter repair kits para kadagiti nadadael a pagtaengan.
Impasigurado ni Alejandro nga awan ti agbalin a parikut iti suplay ti taraon ta nakasagana dagiti family food packs ti Department of Social Welfare and Development ken agtultuloy a manaynayonan tapno masigurado ti agtultuloy nga ayuda.
Nagpanawagan pay ti opisial iti provincial government a makikammayet iti Regional Disaster Risk Reduction and Management Council ken OCD tapno masigurado a maited amin a kasapulan a tulong dagiti naapektaran iti bagyo.
