Nangisayangkat ti Office of the Civil Defense Region 1 iti pre-disaster risk assessment kas panagsagana iti manamnama a panagduprak ti Tropical Depression ‘Crising’.
Iti pannaki-uman ti Bombo Radyo Vigan ken ni OCD Regional Director Laurence Mina, babaen iti pannakaisayangkat ti pre-disaster risk assessment ket makita no kasano ti kinasagana ken addang dagiti member agency, Local Disaster Risk Reduction and Management Offices ken dagiti Local Government Unit no kas bilang dumteng ti bagyo.
Uray ti status dagiti non-food items a maited kadagiti posible a maapektaran ket karaman pay a nakita ti status-na.
Nabigbig met dagiti low land area ket napakaamoan dagiti LDRRMO kadagiti nasken nga aramidenda no kas bilang adda agkasapulan iti preventive evacuation gapu iti napigsa nga angin ken tudo.
Nagpalagip ti opisial kadagiti amin nga agindeg nga agsagana, amuen dagiti pagkamangan no malayus ken agmonitor latta iti damag mainaig iti bagyo.
