Imbilin ti Office of the Civil Defense Region 1 kadagiti Local Government Unit a mangisayangkat iti pre-emptive/forced evacuation kadagiti agindeg nga adda iti high risk area kagiddan ti panagduprak ti Super Typhoon Nando.
Iti pannaki-uman ti Bombo Radyo Vigan ken ni OCD Regional Director Laurence Mina, daytoy ti maysa kadagiti parikut latta no dumteng ti bagyo ta adu dagiti saan a sumursurot nga agindeg.
No la ket ta sigurado a maapektaran ida ti bagyo ket kunana nga ibakwit dagiti agindeg tapno saanda a maisagmak.
Pinalagipanna pay dagiti agindeg a makidamag latta no ania ti sasaaden ti panawen, isagana dagiti kasapulan nangruna ti emergency go bag.
Sipud pay dimmuprak ti bagyo Mirasol ket naka-activate ti Emergency Response Operation Team-da ken uray dagiti member agencies ket naka-red alert status.
Iti salinong ti red alert status, maipatungpal ti nainget a monitoring, reporting, ken coordination kadagiti member agency.
