VIGAN CITY – Pinasingkedan ni Police Capt. Christopher Ramat, hepe ti Sto. Domingo municipal police station, a ti nagmaneho iti Toyota Corolla a ni Lorenzo Luis Naval Madamba nga agtawen iti tallo pulo ket maysa, nurse ken agnaed idiay Namruangan, Cabugao iti akin-basol nu apay a nadungpar ken natay iti maysa nga OFW idiay national highway ti Parada, Sto. Domingo.
Nabigbig ti OFW a ni Emma Labitag Obrero nga agtawen iti tallo pulo ket innem, naasawaan ken agnaed idiay Panay Norte, Magsingal a nagbakasyon laeng ditoy pagilian.
Segun ken ni Ramat, idi kuma nakita ni Madamba nga adda iti bus a nagin-inayad a nagsardeng iti batog ti waiting shed idiay Parada idi alas sais iti agsapa idi June 13, nagin-inayad kuma met isuna iti panagpataray na ta pinanunut na kuma nga adda iti bumaba a pasahero isu a nagsardeng iti bus iti nasao a lugar.
Ti laeng problema ket idiay likod iti bus a nagna ti biktima isu a posible a saan a nasiputan iti nagmaneho ti kotse idi bimmallasiw ket nadungpar na.
