VIGAN CITY – Makitkita ni dati a Bayan Muna Representative – National Union of People’s Lawyers (NUPL) chairperson Atty. Neri Colmenares a guilty iti agbalin a desisyon iti korte kontra kadagiti suspek ti Maguindanao Massacre a napasamak idi November 23, 2009.
Ti pannaki-uman ti Bombo Radyo Vigan kenni Colmenares, imposible a makalusot dagiti akusado iti nasao a kaso ta napigsa dagiti ebidensya kontra kadakuada a kas iti testimonya dagiti witness ken dagiti ladawan kasta payen dagiti naaramat nga alikamen nga adda pakainaigan na iti napasamak a krimen ken uray iti motibo iti krimen.
Para ti dati a diputado, dagiti Ampatuan iti kangrunaan a guilty iti nasao a kaso ta isuda iti adda motibo ken gundaway da a mangaramid iti nakaam-ames a krimen gapu iti nabara a rinnisiris iti pulitika idiay Maguindanao.
Ngem, aminado ti dati a diputado a saan a maliklikan a no ma-acquit dagiti suspek iti nasao a kaso a kasupadi iti namnamaen dagiti kaaduan, dakkel to iti epekto na iti judicial system agsipud ta nagpaot ti sangapulo a tawen.
Malaksid iti dayta, mabalin nga adu iti masao dagiti tattao inaig iti kredibilidad ti gobierno no kas pangarigan a saan a guilty dagiti akusado ta adu payen iti dillaw a nasagrap ti korte gapu iti kinapaot ken saan pay a pannakakemmeg dagiti amin nga adda kainaiganna iti kaso.
