Impaganetget ni Deputy Speaker Ronaldo Puno ken miembro ti National Unity Party a rumbeng a nakabasar iti nalawag ken natibker nga ebidensia iti aniaman nga impeachment kontra ken ni Vice President Sara Duterte.
Iti sarita ni Puno ket rumbeng a siguradoen ti House Committee on Justice nga umdas dagiti dokumento ken pammaneknek sakbay a maipatulod ti kaso iti Senado para iti hearing.
Segun kenkuana, kasapulan nga adda direkta nga ebidensya iti pinansyal no adda napasamak a madi a panagaramat iti confidential funds iti opisina iti bise presidente ken iti Department of Education (DepEd).
Innayonna a napateg nga adda maipakita a pammaneknek kas dagiti rekord manipod Anti-Money Laundering Council a ti pondo ket naipan iti personal a gamit wenno account ti bise presidente wenno kadagiti kabagyan wenno mangibagi.
No awan iti nasao nga ebidensya ket kinuna ni Puno nga agbotos iti partidoda tapno ibasura iti reklamo.
