Impatangken ni President Ferdinand Marcos Jr. a saan a maikkat ti National Task Force to End Local Communist Armed Conflict (NTF-ELCAC) iti baet ti panawagan ti maysa a kongresista nga i-abolish iti task force.
Segun ken ni National Security Council Assistant Director General Jonathan Malaya, bigbigen mismo ti presidente iti balligi ti task force iti panangpakapsot ti Communist Party of the Philippines – New People’s Army-National Democratic Front of the Philippines.
Iti pakaammo ti NTF-ELCAC, bimmaba iti bilang dagiti nabatbati a pwersa iti NPA ta manipod iti walopulo ket siam a guerilla fronts ket maysa laengen ti nabatbati a weakened guerilla front idiay Camarines Sur a manamnama a ma-dismantle ita a tawen.
Iti agdama, 1,050 laeng iti nabatbati nga armado a kameng ti NPA iti agduduma a paset iti pagilian.
