Nagpanawagan ti National Parent-Teachers Association a maibaba ti minimum age of criminal liability iti 10 years old manipud iti agdama a 15 years old.
Dayta ket kasaruno ti pasamak a bullying iti Quinarayan Elementary School iti ili ti Narvacan, Ilocos Sur a nakairamanan dagiti agad-adal.
Iti pannaki-uman ti Bombo Radyo Vigan ken ni Willy Rodriguez, President iti NPTA, ti panangibaba iti minimum age of criminal liability ket tapno mabuteng dagiti agad-adal nga agaramid iti kinaranggas.
Naalarma ti grupo iti nag-viral a video ti pannakadangran ti maysa nga agad-adal ket patienda a resulta daytoy iti panagbuya kadagiti kinaranggas iti social media ken kurang a pannarabay dagiti nagannak.
Innayon ni Rodriguez a ti napasamak ket gapu iti kinamanagbaybay-a ti principal ken ti mangisursuro a nangbalawanna no ayanna idi iti dayta a gundaway.
Insingasing ti NPTA a mapapigsa ti Child Protection Committee ken duties and responsibilities ti PTA iti kada pagadalan, ken maaddaan iti prevention ken seminar tapno maliklikan ti nasao a pasamak.
Malaksid dayta, kunana a nasken a nakabantay dagiti nagannak ken maireport a dagus no adda dagiti insidente ti bullying wenno ania man a kinaranggas kadagiti pagadalan.
