VIGAN CITY – Nainget a maipatungpal ti “NO ID, NO EXAM” policy para iti umadani a Civil Service Examination inton Agosto 20, aldaw ti Domingoidiay Ilocos Sur National High School para kadagiti agexam iti Sub-Professional Level ken iti University of Northern Philippines para kadagiti ag-exam iti Professional Level.
Iti pannaki-uman ti Bombo Radyo Vigan ken ni Provincial Director Marina Cabañero, kasapulan nga itugot dagiti examinee ti isu met laeng nga ID nga impakitada iti nagaplikarda.
Malaksid dayta, pinalagipanna pay ida nga agitugot iti agas, makan, black ballpen, ken isaganada ti bagbagida.
Ditoy probinsia, 3,759 ti total examinee ita a bulan – buklen ti 3,366 a Professional takers ken 393 ti Sub professional takers.
Kabayatanna, kas paset ti agtultuloy a panagsagana ti Civil Service Commission Ilocos Sur Field Office para iti umadani nga exam ket nangisayangkatdan iti briefing kadagiti test administrator ken dagiti DepEd employees inaig no ania dagiti rebbengda nga aramiden kabayatan ti exam.
Karaman payen nga isagsaganada dagiti suplay, listaan dagiti test personnel ken dagiti room assignment.
Inton malem ti Sabado ket isunto met ti pinal a panagbisitada kadagiti pagadalan a pakaisayangkatan ti exam.
