VIGAN CITY – Nakitinnulag ti National Food Authority Region 1 iti Provincial Government of Ilocos Sur ken ti nadumaduma a Local Government Units para iti Palay Marketing Assistance Program for Legislation and Local Government Units (PALLGU) a ti gagemna ket matulongan dagiti mannalon a manayunan ti pamastrekanda.
Iti pannaki-uman ti Bombo Radyo Vigan ken ni NFA Grains Officer Eunice Abalos, malaksid iti buying price ti NFA a sangapulo ket siam a pisos ket mangted dagiti LGU iti additional premium iti panaggatangda iti irik dagiti mannalon.
Nupay kasta, nangipatuloden ti ahensia iti surat kadagiti nadumaduma a Local Government Unit.
Nakasagana met ti LGU-Santa a tulongan dagiti mannalon babaen ti panangnayunda iti tres pesos per kilo iti irik isu a ti gatangda ket agbalin a duapulo ket dua a pisos.
Kabayatanna, impasigurado ni Gov. Jerry Singson a tumulong babaento ti panangkiddawna kadagiti LGU a suportaran ti nasao a programa.
Iti agdama, mayur -uray ti pannakairemit ti pondo iti NFA sakbay a makapagpipinnermadanto iti Memorandum of Agreement.