VIGAN CITY – Panaglabsing iti Presidential Decree 1865 wenno Illegal Sale of Petroleum Products ti sangwen ti maysa a lalaki a natiliw gapu ti iligal a panagilakona iti produkto petrolyo.
Nabigbig ti suspek a ni Normandie Meliton, agtawen iti uppat a pulo ket siam, negosyante a taga-Poblacion Norte, Lidlidda.
Nangiwayat iti operasyon dagiti pannakabagi ti linteg a nakatiliwan ken nakaalaan manipud iti suspek ti maysa a bote ti diesel a nagserbi a buy-bust item, maysa a Coca Cola case a naglaon iti sangapulo ket dua a botelya iti unleaded gasoline, sabali pay a case a naglaon iti sangapulo ket maysa a botelya ti diesel ken maysa a piraso ti sangagasut a pisos a nagserbi a buy-bust money.
Nakakustodian ti suspek iti Lidlidda Municipal Police Station tapno dumalan iti husto a proseso.
