VIGAN CITY – Nagsagaba iti dunor iti ulo ken rupa ti maysa a negosyante ta kinabil ti dua a nakainomanna idiay Sitio Payad, Brgy. Cabaritan, Sto. Domingo, Ilocos Sur.
Iti pannaki-uman ti Bombo Radyo Vigan ti biktima a ni Rodel Bagaan Corpuz, agtawen iti tallopulo ket lima, negosyante nga agnaed idiay Barangay Cabaroan, Magsingal, adda iti saanda a nagkikinnaawatan ken ni Rolito Pamani inaig iti panangalana iti kurong-kurongna idin napan nagpaarayat ni Pamani kada Charlie Tarrango Fuller ken Jay Lee Tuzon Tarrango, agpada nga agtawen ti duapulo ket uppat, baro, laborer nga agnaed iti Sitio Payad, Brgy. Cabaritan ket nagtinnulonganda isuna.
Segun ken Corpuz, binugbogda agingga adda ti maysa kadagiti suspek iti nangpatit iti ulona babaen iti iskupeta a gappuanan iti pannakaparintumengna idinto a pimmanaw dagiti suspek.
Inkalintegan met ni Charlie Fuller a napanda laeng nagarayat ta nagpatulong kadakuada ni Pamani ket saanna a dinangran ti biktima ngem innalana iti eskupeta ta inaramatna a pinangbubuteng tapno koma pagawiden ti biktima ken dagiti kakaduana ket patienna a naala ti dunor ti biktima idi nagginnagawda iti eskupeta.
Nupay kasta, nagkiddaw ti pammakawan ni Fuller ket kalikagumna iti pannaki-areglo ni Corpuz kagiddan iti panagkarina nga isudan iti aggastos iti pagagasna.
Kabayatanna, ti nasao nga eskupeta ket addan iti Sto. Domingo PNP ta insuko ti ikit ni Charlie a ni Fatima Tarrango Susa kalpasan iti panagkabil idinto a dagiti suspek ket addan ti kustodiya dagiti pannakabagi ti linteg kalpasan a dimmalanda iti medico legal.
