VIGAN CITY – Depression iti mapapati a rason iti nagpakamatayan ti maysa a negosyante itattay alas dies y medya iti bigat idiay Brgy. Calongbuyan, Galimuyod, Ilocos Sur.
Segun ken ni PLt. Allan Reoliquio, Officer-in-Charge iti Galimuyod Police Station, agsagsagaba iti kidney failure ti biktima a ni Eleazar Manzano Tejada, agtawen ti limapulo ket dua, naasawaan nga agnaed iti nasao a lugar ket mapapati a marigatanen ti kasasaadna ta manarimaan iti panag-dialysis na a gappuanan iti panangpaltogna iti bagina.
Maibasar iti imbestigasyon ti Galimuyod Police Station, sakbay a binaon ti biktima ti kaanakanna a ni Christian Gagusan a mapan iti kusina tapno agluto ket binagaanna a saan a makigkigtot ken agbuteng.
Idi adda ni Gagusan iti kusina ket nakanggeg laengen ti putok ti paltog isu nga insigida a napan iti kuarto ti biktima ket nakitanan a natayen ti biktima ta ulo ti tinamaanna.
Kabayatanna, ti inaramat a pinagpakamatay ti biktima ket maysa a Calibre 45 pistol.
