Inabswelton ti 2nd Division ti Sandiganbayan ti negosyante a ni Janet Napoles iti kaso a graft ken malversation kadua ti dati nga executive ti National Livelihood Development Council nga adda pakainaiganna iti Priority Development Assistance Fund wenno PDAF scam case.
Iti 98-page-decision a sinurat ni Associate Justice Arthur O. Malabaguio a nairuar idi September 18, 2024 a saan a naiparang dagiti government prosecutor dagiti ebidensya a mangibaga a guilty ni Napoles basar iti mapapati a krimen a naaramidna.
Malaksid ken ni Napoles, naabswelto pay gapu iti awan ti umanay nga ebidensya ni NLDC President Gondelina Amata ken Assets Management Division Chief Gregorio Buenaventura.
Ti kaso ket nakainaigan ti PHP5 million manipud iti Priority Development Assistance Fund o PDAF wenno pork barrel nga inlatang ni dati a La Union Rep. Victor Francisco Ortega nga iligal a napan iti Social Development Program para iti Farmers Foundation Inc., maysa nga NGO nga adda pakainaiganna ken ni Napoles.
Numan pay naabswelton, agtalinaed latta ni Napoles iti Correctional Institution for Women ta nakonbiktaran iti kaso a plunder ken multiple counts of graft, malversation of public funds, ken corruption of a public official.
