VIGAN CITY – Kaso a panaglabsing ti Section 4 ti provincial Ordinance Number 15-06 series of 2015 iti sanguwen ti maysa a negosyante a ginandat na iti agiserrek iti karne ti baboy ditoy probinsiya.
Nabigbig ti negosyante a ni Neneth Santos nga agtawen ti tallo pulo ket walo, balasang a negosyante nga agnaed idiay Upig, San Ildefonso, Bulacan a nagmaneho ti Toyota Hi-Ace Van a nakaikargaan ti walo a drum ti karne ti baboy a nasalamaan dagiti otoridad idiay Barangay Catayagan, Sta. Lucia idi alas otso y media idi rabii, November 26.
Kadua ni Santos a naglugan iti nasao a van da Elizabeth Tomas nga agtawen ti lima pulo ket uppat, naasawaan, negosyante ken agnaed idiay Poblacion, Valencia, Bukidnon kenni Mark Jerome Igme nga agtawen ti tallo pulo ket pito, naasawaan, negosyante a taga Upig, San Idelfonso, Bulacan ngem agnanaed iti agdama idiay San Julian, Vigan City.
Agpapa-amyanan ti nasao a lugan idi saan a nagsardeng iti quarantine checkpoint ken saan da nga inpainspeksyon iti kinarga da isu a mapapati a kinamat dagiti otoridad agingga a nakadanun da idiay Barangay Catayagan, Sta. Lucia.
