VIGAN CITY – Inlawlawag ni Gov. Ryan Singson a saanen a kasapulan ti negative result ti RT-PCR test, health certificate ken quarantine kadagiti sumrek ditoy probinsia malaksid laeng kadagiti turista ta masapulda nga ipakita ti negatibo a resultada iti RT-PCR test.
Dayta ket kalpasan ti inyulog ti National Inter-Agency Task Force a resolusyon nga adda ti maymaysa a pagannurotan a masurot iti panagserrek kadagiti probinsia.
Iti pannaki-uman ti Bombo Radyo Vigan ken ni Gov. Ryan Singson, kayat ti national a maipatungpal ti S-pass a maaramat no sumrek kadagiti probinsia ken maidownload a kas paset iti contact tracing ngem agsipud ta awan pay ti pinal a desisyon ti national ket yurayda pay ti pammilin sakbay a maipakammo iti publiko.
Nupay kasta, binalakadan ti gobernador dagiti Local Government Units a no adda man nayon a guidelines da ket ipakammoda iti provincial government tapno maikabilda iti S-pass kas paset iti monitoring ken pakabigbigan no napanan dagiti simrek iti tunggal ili.
