VIGAN CITY – Pinasingkedan ni Gov. Ryan Singson babaen ti exclusive interview ti Bombo Radyo Vigan a saanen a kasapulan nga agquarantine dagiti agawid manipud ruar iti probinsia ngem masapul nga adda maiparangna a negative result ti RT-PCR test.
Segun ken ni Gov. Singson, saanen a masapul ti medical certificate nga aggapu iti local government unit wenno travel authority manipud ti Philippine National Police ta kakaisuna nga RT-PCR test laeng iti sapulen dagiti agbantay iti border sakbay a makastrekda ditoy probinsia.
Mabalinda ti agpa-test tallo agingga uppat nga aldaw sakbay a sumrekda ditoy probinsia ngem no adda sintomas iti Covid19 ti umay ket kapilitan nga ag-quarantine.
Ti nasao nga addang ket kas panangsurot iti unified travel protocols nga inyetnag ti Inter-Agency Task Force ta gagemda a maymaysan ti masurot a requirement isu a ditoy probinsia ket makiddaw latta ti negatibo a resulta kas paset ti panagannad ti provincial government kontra Coovid19.
Nupay kasta, kiniddaw ti gobernador ti panagtitinnulong ti tunggal maysa ken ti panagbalin a napudno kadagiti marikriknada nangruna ita a napalukayanen dagiti pagannurotan.
