Nangiruar iti pammilin ti National Disaster Risk Reduction and Management Council kadagiti amin a member agency-da ken dagiti local DRRMC a pabilgen ti panagsagana kasaruno ti panangrugi ti warm ken dry season iti pagilian.
Iti nairuar a memorandum a pinermaan ni NDRRMC Executive Director Usec Harold Cabreros, nabilin dagiti Disaster Risk Reduction and Management Council a siguradwen a nakasagana ti emergency medical services, makanay a suplay ti agas, cooling equipment, ken napaspas a deployment dagiti response teams.
Mapabileg pay ti pannakaisaknap dagiti health advisory ken palagip iti publiko kas ti panangliklik iti nakaro a pudot manipud alas dies iti agsapa agingga alas kuatro iti malem, panagisuot iti presko a kawes ken panagaramat iti payong wenno kallugong.
Nabalakadan met ti sektor ti agrikultura a mangipatungpal iti climate-resilient practices tapno maksayan ti epekto ti nakaro a kinabara ken pasaray agbaliw a panawen iti produksionda.
