Imbilin ti National Disaster Risk Reduction and Management Council (NDRRMC) ti amin a regional ken local disaster office a papigsaen ti panagsagana iti posible a panagdupprak ti bagyo Basyang.
Basar iti memorandum a pinermaan ni NDRRMC Executive Director ken OCD Administrator Usec. Harold Cabreros, nabilin dagiti ahensia a mangted ti impormasion iti publiko, mangikabil ti pakdaar kadagiti lugar nga adda pangta na iti layus ken landslide, mangiruar ti travel advisory ken posible a suspension ti biyahe.
Karaman pay iti pammilin ti nainget a pannakaipatungpal ti pre-emptive evacuation, “no sail policy” ken movement restriction no kasapulan.
Naballaagan met dagiti umili na adda iti asideg ti karayan, watershed ken nababa a lugar a dagus nga agsagana ken agbakwit sakbay a kumaro ti paniempo.
