VIGAN CITY – Nainget iti panang-alerto ti National Disaster Risk Reduction and Management Council (NDRRMC) kadagiti local counterpart da inaig iti napasamak a gingined idiay Mindanao idi alas -9: 11 iti agsapa idi kalman, October 31.
Maibasar iti record ti Philippine Institute of Volcanology and Seismology (PHIVOLCS), ti gingined a napasamak ket nagsentro met laeng idiay Tulunan, Cotabato a ti kapigsa na ket magnitude 6.5 a ti Intensity 7 ket narikna idiay Tulunan, Cotabato; Kidapawan City ken Bansalan, Davao del Sur.
Ti pannaki-uman ti Bombo Radyo Vigan, nadakamat ni NDRRMC- Office of the Civil Defense spokesman Mark Timbal nga agtultuloy iti panangmonitor da iti kasasaad dagiti naapektaran iti baro manen a gingined a napasamak iti nasao a rehiyon ket nakasagana ti opisina da kadagiti tulong nga ipaay da kadagiti agkasapulan, depende iti report kadakuada dagiti local government unit ken dagiti local disaster units a nakadeploy idiay Mindanao.
Kagiddan iti dayta, inallukoy ni Timbal iti publiko, nangruna dagiti adda idiay Mindanao a saan da nga agdanag ken agalerto da latta a kanayon.
