VIGAN CITY – Immapela ti National Disaster Risk Reduction and Management Council (NDRRMC) kadagiti mangayat a tumulong kadagiti biktima ti gingined idiay Mindanao a makikinnammayet da kadagiti local government unit wennu iti mismo opisina ti NDRRMC para kadagiti tulong nga ited da.
Ti pannaki-uman ti Bombo Radyo Vigan ken ni NDRRMC – Office of the Civil Defense spokesman Mark Timbal, nadakamat na a napinpintas nu maipakaammo kadagiti LGU idiay Mindanao wennu kadagiti regional offices ti NDRRMC nu siasino dagiti grupo wennu tao a mapan mangited iti tulong kadagiti biktima iti nagsasaruno a gingined iti nasao a rehiyon tapnu masigurado a dagiti agkasapulan iti maikkan ken saan a maabuso dagiti mayat a tumulong.
Kagiddan iti dayta, ingunam-gunam ni Timbal a makanay iti relief support nga iwarwaras ti national government para kadagiti nadidigra idiay Mindanao babaen kadagiti regional offices da.
Malaksid iti dayta, ingunam-gunam ti opisyal nga awan ti humanitarian crisis iti nasao a rehiyon.
