Kayat ti National Disaster Risk Reduction and Management Council nga agbalin a naurnos, natalged, ken nakappia ti panangrambak iti Undas ita a tawen isu nga agtultuloy ti inda panagsagana kas kadagiti dadduma pay nga ahensia ti gobierno.
Iti nairuar a memorandum, binilin ti ahensia dagiti amin a regional ken local disaster council a siguradoen ti kinasagana iti emergency response, seguridad ken kinatalged ti publiko.
Karaman kadagiti pammilin ti nainget a koordinasion iti Philippine National Police, Bureau of Fire Protection, Department of Transportation, Department of Public Works and Highways ken dadduma pay nga ahensia.
Karaman pay ti pannakaipatungpal ti traffic management kadagiti kamposanto, pantalan, ken terminal kasta payen ti pannakaipan ti husto nga impormasion ken pammalagip ti ahensia iti publiko.
