Nangted iti pammilin ti National Disaster Risk Reduction and Management Council kadagiti amin nga opisina ti disaster management a papigsaen ti panagsagana gapu iti bagyo Basyang.
Maibasar iti memorandum a pinermaan ni NDRRMC executive director ken OCD Administrator Harold Cabreros, karaman kadagiti naibilin ti dagus a panangited iti husto ken naintiempoan nga impormasion iti publiko babaen iti multi-platform communication; panangikabil iti husto a warning sign kadagiti lugar a delikado iti landslide ken layus; panangiruar iti travel advisories ken posible a suspension iti land ken air travel; ken nainget a pannakaipatungpal ti pre-emptive evacuation kadagiti napeggad a lugar.
Kasta payen ti nainget a pannakaipatungpal ti “no sail policy” ken movement restriction para iti kinatalged ti public ken panangisagana kadagiti resources ken panangipasigurado iti kinasagana dagiti personnel, lugan, ken alikamen para iti alisto a panagresponde no adda emergency.
Nabalakadan pay dagiti adda iti aglawlaw ti karayan, watershed ken nababa a lugar a dagus nga agsagana ken agbakwit sakbay a kumaro ti kasasaad ti paniempo.
