VIGAN CITY – Kiddaw ti Philippine Sports Commission a maikkan iti naan-anay a pondo dagiti Filipino Athlete a makisali iti nadumaduma a kompetisyon kangrunaan nu madanondan iti international competition.
Iti pannaki-uman ti Bombo Radyo Vigan ken ni PSC Commissioner Ramon Fernandez, kiddawna a saan laeng a nu mangabak dagiti Filipino Athlete a maikkanda iti cash incentives ta nangnagruna a kasapulanda iti alokasyon a mailatang para iti panagsagana ken panagsanayda para iti pannakilabanda.
Segun ken ni Fernandez, maib-ibusen iti pondo a maaw-awat ti PSC manipod PAGCOR a naggapo kadagiti elite athlete a miembro iti National Teams ta addaan ti innem a pulo a nadumaduma a sports a bigbigbigen ti POC a supsuportaran ti PSC.
Inlawlawagna a dua iti paggapuan iti pondo ti PSC nga isu iti General Appropriations Act (GAA) nga isu iti agbalin a subsidy ken sweldo dagiti kameng ti PSC idinto a ti maysa ket ti PAGCOR a nailatang para iti maaramat ti panagsanay ken allowance dagiti atleta para iti kompetisyon ngem naapektaran gapu iti agtultuloy a covid-19 pandemic.
