Awan pulos iti naisalbar a gamit dagiti agnaed iti maysa a pagtaengan a nauram itay idiay Barangay Nagsuputan, San Juan, Ilocos Sur.
Iti pannaki-uman ti Bombo Radyo Vigan ken ni Senior Fire Officer 2 Albert Rabanal a Chief Intelligence and Investigation Unit iti San Juan Bureau of Fire Protection, napaspas a nagkayamkam iti uram iti pagtaengan da Cecilia Venenciano ta naaramid laeng iti light materials.
Segun ken ni Rabanal, iti panagrespondeda ket narigatan pay a simrek iti fire truck iti lugar a nakapasamakan iti uram ta nailet iti pagnaan.
Iti pakpakauna nga imbestigasyon ket mapapati a gapu iti napanawan a cellphone a nakasaksak iti extension wire iti nagtaudan iti uram.
Nupay kasta, awan iti nadangran ken naan-ano iti nasao a pasamak.
VIDEO – SENIOR FIRE OFFICER 2 ALBERT RABANAL
Kabayatanna, agpanpanawagan iti tulong ni Cecilia Venenciano ta awan pulos iti naisalbarda a gamitda ta nairana a napan nagtrabaho idi nauram iti pagtaenganda idinto a ti asawana ket napan nagitulod kadagiti annakda nga agbasbasa pay laeng.
Inlawlawagna nga awan pulos iti naisalbar da a gamit ta amin a napapateg a dokumento ken alikamenda ket dimmapo.
Iti agdama ket agtaltalinaedda iti pagtaengan ti katuganganna ket saanda nga ammo nu kasano iti panagrugida manen ta awan pulos iti nabati kadakuada.
VIDEO – CECILIA VENENCIANO
