VIGAN CITY – Pakadanagan ti National Union of Peoples Lawyers ken Legal Profession ti agtultuloy a pammapatay kadagiti abogado kas iti napasamak ken ni Attorney Maria Saniata Liwliwa Gonzales Alzate idiay Bangued, Abra.
Iti pannakipatpatang ti Bombo Radyo Vigan kenni Attorney Ephraim Cortez, Presidente ti National Union of Peoples Lawyers, dakkel ti epektona ti pammapatay, harassment ken pangta iti biag dagiti abogado kangrunaan kadagiti adda iggemna a human right cases.
Nabayagen a mangipapaay iti pro-bono legal service kadagiti indigent litigants ken agserserbi a private prosecutor ni Attorney Alzate.
Patien ti grupo nga adda pakainaigan ti pannakatayna iti legal assistance nga ipapaayna kadagiti biktima ti illegal arrest, detention ken torture iti Philippine National Police.
Gapu dayta, nangipila isuna ti writ of habeas corpus ken nakaala iti protection order para kadagiti dua a kliyentena.
Nagpanawagan ti NUPL iti Supreme Court a masapul nga agaramidda iti addang no kasano a solusyonan dagiti pammapatay ken iyasidegda ti UN Special Rapporteur of Judges and Lawyers ken dadduma pay nga international court iti kaso ni Atty. Azalte tapnu maibutaktak iti mapaspasamak a pammapatay kadagiti abogado ti pagilian.
Namnamaen pay ti grupo nga agtignay ti gobierno tapno masolusyonan iti pammapatay kadagiti miembro iti legal profession.
Kabayatanna, maikatlon ni Atty. Alzate a natay iti salinong ti Marcos Administration ken awan pay iti napilaan ti kaso ken naibalod kadagiti limapulo ket tallo a natay nga abogado sipud idi Duterte Administration agingga ita.
