Umaboten iti 39 ti bilang dagiti natay gapu iti Habagat ken bagyo Luis, Maymay, ken Neneng, segun iti Office of Civil Defense.
Maibasar iti OCD, nairekord ti 15 a natay idiay Benguet, sag-uppat idiay Rizal ken Batangas, saggatlo idiay Zambales ken Caloocan, sag-dua idiay Pampanga, Quezon ken Occidental Mindoro, saggaysa idiay La Union, Pangasinan, Oriental Mindoro, ken Negros Oriental.
Umabot met iti 20 ti nadunor, idinto a tallo pay ti mapukpukaw.
Kabayatanna, pakabuklan a 9.4 milion a tattao wenno 2.7 milion a pamilia ti naapektaran iti nagtipon a saan a nasayaat a paniempo iti Ilocos Region, Central Luzon, Bicol, Western Visayas, Calabarzon, Cordillera Administrative Region, Metro Manila, ken MIMAROPA.
Agtaltalinaed met iti 968 dagiti evacuation center ti 71, 364 a tattao wenno 20,279 a pamilia.
