Umaboten iti sangapulo ket tallo ti bilang dagiti natay gapu iti leptospirosis iti San Lazaro Hospital idiay Manila, idinto nga umaboten ti 104 dagiti pasyente a naka-admit kalpasan ti layos gapu iti nagsasaruno a bagyo.
Karaman kadagiti pimmusay ti maysa nga agtawen iti sangapulo ket innem a nakarikna ti acute renal failure.
Segun ken ni San Lazaro Hospital Medical Center Chief David Suplico, ti kinakurang ti pannakaammo ti publiko a dagiti ospital ti gobierno ken barangay health centers ket mangipaay iti libre a prophylaxis no nalayusda ti mapatta-pata a rason ti panagadu dagiti kaso ti leptospirosis.
Ti nasao a sakit ket saan laeng a mayakar babaen iti danum ti tudo, no di ket babaen pay iti ibleng wenno isbo ti bao, ngem maagasan ti sakit no masigudan.
